قبل البوست
وحشتونى جدا
وبجد محتاجة دعوتكم
لان الموضوع بقى هبل فى الامتحانات
انا بفكر اجمع اجباتى وانشرها فى كتاب واسميه
اضحك من قلبك
دانا الفت تاليف يا ولاد
يا لهوى ى ى ى
دانا لو بعمل فيلم مش هالف ده كله
ربنا يستر على الدكاترة اللى بيصححوا بقى
المهم
انا بكتب ليكم البوست ده من تحت المكتب
احسن لو ماما شافتنى هتعلقنى انا واللاب توب فى البلكونة
وتغنى من ده بكرة بقرشين
ندخل فى الجد بقى
البوست اللى فات بتاع التاج الى اتبعتلى
جالى فيه رد من الفاتح الجعفرى
وبيقولى انى شكلى بحب الصحابة اوى
للمزيد من المعلومات راجع البوست السابق).....ايه شغل الكليات ده )
ما علينا
المهم يعنى
فكرت
وقلت
ليه معملش بوست اشارككم افكارى فى موضوع الصحابة ده وحبى ليهم
ووريكم انا ليه بجد امنية حياتى الابدية انى ااقابلهم فى الجنة ان شاء الرحمن
ربنا يوعدنا ويوعدكم كده
او حتى لو كان لا قدر الله مصيرى مكان تانى
نفسى بس اشوفهم واقولهم ربنا يكرمكم ويباركلكم
على العموم انا مش هتكلمم عن الصحابة كلهم اكيد
لكن
فيه صحابى واحد
بجد بجد
مع كل مرة كنت بقرء فيها سيرته كنت بارتجف وابكى اسفا وندما انى معشتش فى الزمن ده عشان اشوفه
واقوله قد اه هو عظيم
الصحابى ده
هو
سيدنا الفاروق عمر بن الخطاب
---------------------------------------------
قيل عن ابن الخطاب
يا محمد استبشر أهل السماء بإسلام عمر.
جبريل عليه السلام
لو كان بعدي نبي لكان عمر بن الخطاب
رسول الله صلى الله عليه وسلم
------------------------------------------------
بصوا بقى
لما كنت بقعد مع اصحابى
طبعا كان البنات السؤال الوحيد الى يهمهم
شايفة فارس احلامك ايه
وايه مواصفاته
وطبعا اللى تقولك
طويل واللى تقولك عايزاه وزير
واللى تقولك احمد عز عشان مسلح ضد الفقر
(ولو ان مافيش حاجة بعيدة عن ربنا)
المهم يعنى
كان السؤال بيجى عندى واقعد افكر
وبيكون رضى
نفسى اتجوز عمر بن الخطاب
طبعا العيال يضحكوا
يقولوا انتى هاطلة
بس انا متاكده
لو كانوا عرفوه زى مانا عارفاه كانوا هما كمان اتمنوا يبقى عرسانهم نسخ من عمر ابن الخطاب
تعالوا بقى اقولكم ليه
اولا لو حد فيكم قراء اى كتاب عن الصحابة
هتلاقيه بيعيد قراية الجزء الخاص بيه اكتر من مرة
عشان ممهما حصل مش هتعرف تديله حقه من انتباهك ومن حبك ليه من اول مرة
انا مش هاتكلم عن سير ته الدينية
بس بداية حبى ليه كان موقف ليه
بيقول ايه بقى الموقف ده
===============================
وفي يوم من الأيام عندما كان عمر أميراً للمؤمنين كان هناك رجلاً تراجعه زوجته فترك لها البيت وذهب يشتكي لعمر، فذهب إلى بيت عمر، فقبل أن يطرق الباب سمع صوت زوجة عمر وهي تراجعه، فلم يطرق الباب وقرر أن يمشي، وبينما هو ذاهبٌ فتح سيدنا عمر الباب فقال: أجئتني؟
قال الرجل: نعم.
قال: أطرقت الباب؟
قال: لا.
قال: فلم؟
قال: والله جئتك أشتكي من زوجتي فوجدت أن زوجتك تفعل معك ما تفعله زوجتي فتركتك وعدت.
انظر ماذا قال عمر: تحملتني، غسلت ثيابي، بسطت منامي، ربت أولادي، تفعل كل ذلك وتتحملني أفلا أتحملها إذا رفعت صوتها؟
==================================
الموقف ممكن يكون صغير
بس بجد فيه معنى
بالنسبة لى انا فى حياتى ده اهم حاجة لازم تكون فى الراجل
وهى التقدير
ايوة والله التقدير
يعنى ايه تقدير
يعنى راجل يقدر
راجل حاسس بزوجته
وانها قد ايه بتتعب
وانه ميجراش حاجة لو مرة صوتها على ولا حاجة
سيدنا عمر هنا كان مقدر
مع انه كان ممكن يقتل مراته
وكان ممكن يطلقها
ده امير المؤمنين اللى الشيطان لما بيشوفه بيمشى فى طريق تانى
عمر بن الخطاب اللى لما كان عند حجام وتنحنح بس
ادوات الحلاقة وقعت من ايد الراجل وكان هيغمى عليه
عمر ابن الخطاب اللى كان بيهابه كل الناس
اللى بعد اسلامه الملسمين بقوا اعزة
تخيلوا الراجل القوى ده
الفااااااااااروق عمر بن الخطاب
زوجته كانت بتراجعه
وكانت بتتناقش معاه
ولو كان رايه فيه حاجة غلط كان ممكن ياخذ برايها
----------------------------
يارب تكون فهمتوا قصدى
بجد لله فى لله انا بحب سيدنا عمر بن الخطاب
ونفسى
نفسى
ان ربنا يرزقنى بحد فيه واحد على مليون من سيدنا عمر
عاوزة اوريكم شوية مواقف ليه
بس على الصعيد الانسانى مش الدينى
لان على الصعيد الدينى محتاجين مدونة من بابها
المهم
اسمعوا معايا
------- ------- -------
لما تتسول يا رجل : هكذا قالها عمر فى طريقه عندما وجد رجلا مسنا يتسول ..فقال الرجل.. يهودى أبحث عن مال لادفع الجزيه فقال عمر أخذنها منك و انت شاب و نرغمك على التسول و انت شيخ لا والله ..والله لنعطينك من بيت مال المسلمين و قال ردوا عليه ما دفع من قبل و يأمر عمر بن الخطاب من الان فى كل الولايات الأسلاميه من كان هناك فقير أو ضعيف أو طفل أو أمراه من يهود او نصاره يصرف له من بيت مال المسلمين لأعانته على العيش .
------- ------- -------
لو الراجل ده يا خونا كان رئيس جمهوريتنا
تفتكروا كانت مصر فيها مشاكل وضطهاد؟
كان حالنا ممكن يوصل لكده
عجبى
................
وده كمان موقف ليه
------- ------- -------
كان سائرا فى طرقات المدينه كعادته ليلا ليسمع صوت طفل صغير يبكى فيقترب .. و يسأل ما بال الصغير بالله عليكى نومى الصبى ( قالها لامه ) فذهب يكمل جولته الليله و مر عليهم مره أخرى فقال بالله عليكى نومى الصبى فقالت المرأه نعم و هكذا مره أخرى فبات بجوار البيت.... ما لكى أم سوء أنتى ما باله فقالت دعنى فأن عمر بن الخطاب لا يصرف الآ لمن فطم فأنا اعلل الصبى وأريد أن أفطمه لان عمر لا يصرف الا لمن فطم من أبناء المسلمين ...فبكى عمر و كان وقت صلاه الصبح فلم يفهم المسلمين بماذا يصلى من كثره بكائه .. وبعد صلاته وقف و قال يا ويلك يا عمر يوم القيامه ..كم يا عمر قتلت من أبناء المسلمين ..وقال أيها الناس بالله عليكم من اليوم لا تتعجلوا على أولادك فى الفطام فأنى أصرف لهم لكل مولود يولد فى الآسلام حتى لا أسأل عنهم يوم القيامه .
------- ------- -------
بجد لا تعليق على الموقف ده
ومش عارفة اقول ايه
كفاية كده عليكم
لكن بجد بجد انا مهما دورت مش هلاقى فارس احلام احسن ولا اروع من عمر بن الخطاب
================
همسة اخيرة
لو عايزين تعرفوا اكتر
دوروا على النت
وفيه كتاب لكاتبه اسمه خالد احمد خالد
الكتاب اسمه
بين يدى عمر
بصراحة انا لسه مش قريته
لانى مش عارفة اجيبه منين
بس ليه كمان كتاب اسمه رجال حول الرسول
ده كان حوالى 800 صفحة او اكتر
والله انا قريته مرتين
لانه مش قادرة احكيلكم قد ايه هو رائع وجميل
يارب تستفيدوا من البوست
وتفهموا يا شباب المستقبل ان الموضوع مش انا الراجل فانا اللى كلمتى هتمشى غصب عن عين الكل
تحياتى ليكم
واسفة للاطالة
