بخ....انا هنا اهو

تحديث

لا مش تحديث اوى

هى وكسة اكتر منه تحديث

اسمه ايه ده فرانكشتاين بتاع العبارة اخد براءة

مش بقولكوا احنا فى مجتمع كوميدى

مش لاقية كلمة فى قاموس قلة ادبى تعبر عن احساسى

القاضى هيروح من ربنا فين ؟

وممدوح زفت الطين ده كمان

وكل واحد كان مسئول عن اللى حصل

نفسى اتفرج عليهم وهما بيتحاسبوا

اعرف هيتمنوا الارض تنشق وتبلعهم ولا لا؟

حسبى الله ونعم الوكيل فيكم

وربنا يصبر الاهالى اللى مش قادرين يصدقوا اللى حصل لحد دلوقتى

يالا ماحنا بيقنا منسويش حاجة خالص

الف مبروك يا مصرين انتى بقيتوا

worthless

متفوقين اهو فى حاجة

مالكوش حجة بقى

حسبى الله ونعم الوكيل

===============================

واااااااااااااو

ورجعت من السفر

تايه فى الميكروباص

انا جيت تانى يا رجال

اكتشتف ان زوار المدونة كشوا اليومين اللى فاتوا

عندكم حق

مانا قصرت جامد اوى معاكم

بس بعيد عنك كان عندى شهر مالوش حل

معرفش ازاى عدى عليا

عايزة احكلكم عن حاجات كتير اوى

وعايزة افضل اكتب للصبح

حلو اوى انك يبقى عندك نعمة الكتابة ديه

بجد ربنا كريم اوى

الحمدلله

انا لازلت بعانى من عيب خطير اوى وهو بعثرة افكارى

مش عارفة اكتب بالنحوى ولا اكتب بالعربى العامى

مش عارفة احكيلكم عن نجاحى بتقدير

كويس جدا

= جيد جدا يعنى

ولا احكيلكم عن الدوة التدريبية عن رجل المبيعات الناجح اللى خدتها مع دكتور ابراهيم الفقى

ولا احكلكم عن حكايتى مع خطوبة اعز اصحابى

ولا الاخبار السعيدة اللى بتجيى ورا بعضها لدرجة انى قلقانة ان القيامة تقوم اليومين دول

ولا احكلكم عن طبق السلطة اليتيم اللى لقيت فيه دودة لطيفة بتلعب

ولا ايه ولا ايه

شفتوا ادينى قلت كل اللى حصل

عارفين

الدنيا ديه فيها حاجات حلوة اوى

....

اكيد يعنى فيها

صحيح انا مش قادرة احددلكم

لكن اكيد فيها حاجات حلوة

كفاية انه انا موجودة فيها

نياهاهاهاهاه

بجد وحشتونى

انتوا اخباركم ايه

اخبار النتايج بتاعة اخوانا المعذبين فى الارض زيى ايه ؟

واخوانا العاملين فى صمت

لسه برضه التكشيرة اياها على وشوشكم

اقولكم سر

انا مش انسانة خيرة ولا حاجة

لكن دايما لما بمشى فى الشوارع واتفرج على الكآبة اللى بقت سمى من سمات المصريين

بتمنى يكون معايا عصاية سحرية

وامسح بيها التكشيرة ديه

يا ناس اضحكوا

متخدوهاش جد اوى على راى محمد صبحى

سيبكوا من اللى ضايقكوا

وعلى راى الدكتور ابراهيم الفقى

مادام انت كده كده عايش

يبقى عيش احسن حياة

ومادام كده كده عندك وقت

ليه متعملش فيه حاجة لذيذة

ليه احنا مبقاش عندنا ضمير حتى فى اجازتنا

عارفين

لما تخدوا اجازة خدوها بجد

استمتعوا بكل لحظة بتمر فى حياتكم

عيشوا اللحظة ديه كانها اخر لحظة فى حياتكم

ده هيا حياة واحدة

ليه منعملش فيها اللى احنا عايزينه

ليه منبقاش كويسين ومحترمين وبنحب بعض

وبنضحك ومبسوطين

ليه بقينا مكتئبين وكل واحد شايل الهم فوق راسه وازح

والله مافيه حاجة تستاهل

اعمل لاخرتك كانك تموت غدا

واعمل لدنيا كانك تعيش ابدا

انا مش انسانة ناجحة فى حياتى

بس حاسة ان الحزن والكآبة اخدوا من عمرى كتير وكتير

وعلى ايه ده كله

انا طلعت بالضغط فى الاخر

يا سيدى فكها وسيبها على الله

واضحكوا

ارفعوا السماعة وقولوا للى بتحبوهم انكم بتحبوهم

لو زعلانين من حد سمحوهم

كلنا محتاجين اننا نُسامَح فى يوم من الايام

فكوها ربنا يفكها عليكم

اضحكوا واستبشروا خير

سيدنا محمد لخصلنا استراتيجية الحياة السعيدة فى اربع كلمات

يسر ولا تعسر

بشر ولا تنفر

والله الدنيا ديه كوميديا

ومش هناخد منها غير لحظتين فرح وضحك

وابتسامة تساوى صدقة تنفعنا بعد ما نموت

سيبكم بقى من اللى يزعلكم

وعيشوا كل يوم كانه قصة جديدة ويوم جديد

ومهما قابلك وحصلك قول الحمدلله

الحمدلله على ديشليار نعمة احنا فيها ومش حاسين

لو حاولت اعدهملكم مش هاعرف

نعم الله لا تحصى

اسمه سورة الرحمن

ويس

والواقعة

والدخان

وطه

ومريم

والقمر

وكل واحد بيرتاح لما يسمع سورة يسمعها

اسمعوا موسيقى هادية تهدى اعصابكم وطهر روحكم

لما تروحوا بيتكم العبوا مع ولادكم

واتكلموا معاهم واضحكوا معاهم

باباك ومامتك معذبينك

عادى

ماهما كمان اهلهم عذبوهم

عيشوا انهاردة من القلب

وسيبوا بكرة لما يجيى ابقوا شوفوا هتعملوا فيه ايه

ربنا يحفظكم كلكم ويرعاكم

تعرف ربنا؟

بسم الله الرحمن الرحيم
(وجعلنا من بين ايديهم سدا ومن خلفهم سدا فأغشيناهم فهم لا يبصرون)

اللهم امين يا بُعدة

ازيكم يا اخوانا

كنت لسه بتكلم مع محمود
(رئيس جمهورية نفسه ) انى مش لاقية حاجة اكتبها
متخيلتش ان ربنا هيفرجها عليا كده

وايه
موضوع يمكن تطير فيه رقاب

ولا تطير
ماهى معدتش تفرق

سونيا من سنية

---------------------
تعالو كده كلنا نرجع نسترخى لورا ونرجع ايام زمان ايام طفولتنا البرئية ونفتكر الاغانى البريئة
ومنها الاغنية اللى كانت بتقول ايه

يا فاطر رمضان يا خاسر دينك
القطة السودا هتاكل مصارينك


بصرف النظر عن التعبيرات اللى مش عاطفية فى الاغنية
لكن زمان كانت بنسبالنا فطار رمضان ده معناه مأساة
معناه ان الولد او البنت دول لازم يتجلدوا
وكان اهلنا مفهيمنا انه فطار رمضان طه معناه فضيحة

ولغاية انهاردة عمرى ما اقدرت افهم ازاى فيه ناس مسلمين ممكن يفطروا فى رمضان
بعد ما شفت بعين مسيحين بيكونوا موجودين معانا فى نفس اماكن تواجدنا فى الصيام ومش بياكلوا ولا بيشربوا مراعاة لشعورنا

!!!!ما بالكم بالمسلمين

كل ده مش موضوع اوى

لكن
لغاية انهاردة مش قادرة اتخيل ازاى ناس مسلمين بتعاملوا فى حياتهم كانهم ميعرفوش ربنا

يعنى انا مثلا
لو كذبت مرة او فوت صلاة ببقى مكسوفة اوى من ربنا
وببقى مش قادرة ارفع وشى ابص فى السما

وغيرى ناس كتير على اختلاف درجات ايمانهم واسلامهم

لكن
ان حد يبقى
blood less
كده

اهو ده الغريب

يعنى لما دخلت عند احمد الصباغ ببص على البوست الجديد بتاعه

مش قادرة افهم الناس جرالها ايه

ازاى عارفين انه هايجيى علينا يوم نقف قدام ربنا نتمنى الارض تنشق وتبلعنا ويعملوا كده


بلاش يكونوا متدينين

لكن ده أ ب اسلام
ده يعنى اول حاجة اخدناها فى كتاب الدين بتاع ابتدائى


انا مش قادرة افهم
الناس ديه عقولها راحت فين

انا اعرف الواحد يغلط سنة اتنين تلاتة خمسة
لكن بيرجع يندم ويتوب ويعرف انه فيه ربنا وانه الله حق

لكن افضل عمرى كله عامل نفسى مش من هنا


ازاى

انا بجد لما اتخيل عذابهم عند ربنا بيبقوا صعبانين عليا
مين مننا ممكن يدعلهم بالرحمة

انا عارفة ان رحمة ربنا وسعت كل شيئ

انا مش بقول ان ربنا مش هيرحمهم

بس غصب عنى والله بقول يارب لا ما ترحمهمش

وريهم هما كانوا بيعملوا فينا ايه


انا عارفة ان ربنا مخليهم فى اماكنهم ومخليهم كده عشان يتقل حسابهم

عشان يعرفوا انهم خسروا كل حاجة ومكسبوش ولا حاجة


بجد والله الموضوع مش راضى يدخل دماغى

بحس انى عايزة اروح الطشهم واقولهم فوقوا بقى
فوقوا قبل ما الطوفان يجيى ياخد كل حاجة ويخسف بيكم الارض

وساعتها ولا قرش من فلوسكم ولا واسطة من علاقتكم هتنفعكم

فوقوا

فوقوا ده الناس بتموت مابين غفلة العين وانتباها


يارب
يارب ارنا فيهم يوما اسودا


يارب وريهم اللى بيعملوه فى عبادك يارب

يارب وريهم قدرتك


فوقوا بقى

*-*هل طرقت الباب*-*

تحديث اتأخر شويتين

--------------

يا جماعة حد يعرف لى لى فين ؟

صاحبة مدونة ابتسم شوية ؟

لو حد يعرف هى فين

بس طمنونى عليها

وشكرا لكم

=======================================

والله يا شباب الموضوع ده وقع تحت ايدى بالصدفة زى ما يكون ربنا بعته ليا عشان اقول اللى فى نفسى

مؤخرا انتشر وباء غريب بين الشباب اسمه انا يئست ...
انا زهقت....
انا محبط....
انا مش عارف اعمل ايه ........
انا معنديش امل.....

المرض ده بجد مخيف
والمشكلة ديه ممكن تبقى كارثة
لو الناس مفهمتش الدنيا ماشية ازاى
لما شباب سن 20 و21 و25 و30 حتى
ييأسوا مع اول مشكلة تواجههم
اللى يئس من انه يلاقى شغل
وااللى يئس انه يتفاهم مع اهله
واللى يئس من الواسطة والكوسة اللى فى البلد
و...والخ

ايه يا اخوانا
ايه يا شباب ؟؟؟
فين ايمانكوا بربنا
فين اركان الاسلام
فين الصبر
فين التفاءل
فين ثقتكم بربنا

ازاى عايزين ربنا يساعدكم وانتوا مش واثقين فى قدراته

ازاى عايزين ربنا يساعدكوا وانتوا مش فاهمين الآية اللى بتقول

((ولا تيأسوا من روح الله انه لا ييأس من روح الله الا القوم الكافرون))

على العموم لكل شاب عنده المشاكل ده
اليك الموضوع ده
عشاك تثق بربنا
وتقوى على مواجهة الصعاب
هل آلمتـك الأيام؟
هل سُـدت الأبواب في وجهك؟
هل أظلمت الدنيا في عينيك؟
هل تعثرت خطواتك؟
هل عانيت من اقرب الناس إليك.. من أخوانك.. من أقاربك؟
هل أصابك الجمود؟
هل يئست من الوجود؟
إذا أصابك كل هذا او بعضه.. فأطرق الباب
أطرق باب الذي لا يرد آملا ً في رحمته
اطرق الباب فسوف تجد الجواب؟
اطرقه مرة أخرى واشحذ همتك فسوف يفتح الباب لا محالة
أطرق الباب فإن ما بعد الليل البهيم إلا فجرٌ جديـد وصباح ٌ تتنفس فيه الرضا والسعادة
اطرقه ولا تيأس.. وحاول وكرر الطرق

اطرق الباب وقل: يا اللــــه
أظهر له عجزك.. افتقارك.. ناجيه.. توسل إليه
ابكِ وتضرع اليه ودع الصدر يهتز كالمرجل.. فسوف يفتح الباب
أطرقه فإنه الرحيم الذي هو أرحم من الأم على رضيعها.. وهل تظن ان الأم لاترعى رضيعها؟
اطرق الباب فقد قال وقوله الحق:ادعوني استجب لكم
أطرق الباب كما طرقه نوح عليه السلام فقال:فَدَعَا رَبَّهُ أَنِّي مَغْلُوبٌ فَانتَصِرْ
فجاءه النصر في حينه: فَفَتَحْنَا أَبْوَابَ السَّمَاء بِمَاء مُّنْهَمِرٍ
أطرق الباب كما طرقه موسى عليه السلام عندما ضاقت به الحال في مدين..فَقَالَ رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ.. فرزقه الله الزوجة والعمل والأمان
أطرق الباب كما طرقه موسى عليه السلام عندما داهمه فرعون عند البحر فقال:قَالَ كَلَّا إِنَّ مَعِيَ رَبِّي سَيَهْدِينِ.. فانشق له البحر..فَأَوْحَيْنَا إِلَى مُوسَى أَنِ اضْرِب بِّعَصَاكَ الْبَحْرَ فَانفَلَقَ فَكَانَ كُلُّ فِرْقٍ كَالطَّوْدِ الْعَظِيمِ

أطرق الباب كما طرقه يعقوب عليه السلام عندما فقد يوسف فقال:فَصَبْرٌ جَمِيلٌ عَسَى اللّهُ أَن يَأْتِيَنِي بِهِمْ جَمِيعاً إِنَّهُ هُوَ الْعَلِيمُ الْحَكِيمُ.. فرد الله له ولديه يوسف وبنيامين
أطرق الباب كما طرقه أيوب عليه السلام..وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ
فأتى الجواب:فَاسْتَجَبْنَا لَهُ فَكَشَفْنَا مَا بِهِ مِن ضُرٍّ وَآتَيْنَاهُ أَهْلَهُ وَمِثْلَهُم مَّعَهُمْ رَحْمَةً مِّنْ عِندِنَا وَذِكْرَى لِلْعَابِدِينَ
اطرق الباب كما طرقه ذا النون عليه السلام وهو في ظلمة الليل وقاع البحر وبطن الحوت فقال: فَنَادَى فِي الظُّلُمَاتِ أَن لا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ
فكان الجواب مباشرا من الله:فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ
أطرق الباب كما طرقه زكريا عليه السلام وناداه: إِذْ نَادَى رَبَّهُ نِدَاء خَفِيّاً
وقال: وَإِنِّي خِفْتُ الْمَوَالِيَ مِن وَرَائِي وَكَانَتِ امْرَأَتِي عَاقِراً فَهَبْ لِي مِن لَّدُنكَ وَلِيّاً
وقال:وَزَكَرِيَّا إِذْ نَادَى رَبَّهُ رَبِّ لا تَذَرْنِي فَرْداً وَأَنتَ خَيْرُ الْوَارِثِينَ.. فرزقه الله بيحيى عليه السلام

اطرق الباب وادعوه وادعوه وادعوه فليس بينك وبينه حجاب
وسوف يفتح الباب وتجد الجواب


اتمنى انكم تستفيدوا يا شباب
وانا اولكم

دمتم فى حفظ الله

صمت الحملان

بسم الله

بسم الله الرحمن الرحيم

بسم الله السميع العليم

بسم الله الخبير البصير

بسم الله العلى القدير

---------------------

شكرا

شكرا لكل واحد وواحدة دخلوا المدونة وتمنولى اجازة سعيدة

تسلملولى يا رب

انا بقالى اسبوعين فى مصر

بس مكنتش عارفة اكتب اقول ايه

بفضل فاتحة المدونة ومتنحه ليها

ومش لاقية كلام يتكتب او يتقال

انا مش حزينة

ومش كئيبة ومش اى حاجة

بس احساس غريب اوى اوى

انى مش لاقية كلام

انا بس حبيت اشكركم

واسلم عليكم

واقولكم انكم كلكم وحشتونى اوى

وانا بعتذر انى مش بتواجد عندكم فى التعليقات كتير

رغم انى بحاول اتابعكم كلكم

ادعولى ربنا

يشرح لى صدرى وييسر لى امرى ويحلل العقدة من لسانى

كى يفقه قولى

استودعكم من لا تضيع ودائعه