مش ..عارفة

فراغ

ضياع

توهان

تلت كلمات ملازمنى بقالهم فترة كبيرة

ومش عارفة ليه

بقالى فترة كبيرة حاسة انى مش انا

او انه انا مش معايا

يعنى حاسة انه انا لوحدى مش معايا

فى الفترة اللى فاتت كنت شبه الانسان الالى اللى مش بيفكر

بعمل الحاجات الروتينية اللى متسجلة فى ذاكرتى وخلاص على كده

بعدت عن كل حاجة

بعدت عن التدوين اللى كنت بحبه

وبعدت عن صحابى

اول مرة فى حياتى مسالش عن كل اللى اعرفهم واحد واحد واحدة واحدة

اول مرة احس انى مش عارفة اكلمهم

بامسك الموبايل وافضل متنحاله

مش عارفة اتكلم اقول ايه

حاسة ان كل قدارتى العقلية راحت

اللى حبيته وبحبه وهاحبه راح

حبه نفسه فى قلبى بقى غريب

يبقى قوى اوى فى اوقات

واوقات تانية يبقى مش فارق معايا

ساعات بحس انى مفتقداه بطريقة غبية جدا

وساعات بحس انى ولا اعرفه اساسا

اقرب زمايلى ليا قرر انه ميتكلمش مع بنات تانى

وبعد عنى

اقرب صحباتى بقت بترد عليا بالدين فى كل حاجة اتكلم معاها فيها

وانا مش عارفة اتعامل كده

كنت محتاجها تتعاطف معايا مش تبرر كل حاجة ليا بالدين

مع العلم ان ده العادى بتاعى انى اساعد اى حد فى اى حاجة

انى احاول اساعده بالدين

مش عارفة فيا ايه

مش قادرة اكلم حد

مبقاش عندى قدرة انى اسمع اى حد

ومبقاش عندى القدرة انى اغير نفسى او انى اتحسن او انى اسمع نصايح من حد

مش عا رفة انا عايزة ايه ولا رايحة فين ولا هاعمل ايه

كل حاجة قدامى ملخبطة ومش باينة

مش عارفة ان كنت خايفة ولا مش شايفة

مش عارفة

انا عارفة ان اصحابى مش بيحبوا الرد ده لما يقولوا مالك ؟

بس انا فعلا مش عارفة

انا اسفة لكل الناس اللى مش سالت عنهم ولا عيدت عليهم

بجد اعذرونى انا فعلا فى غيبوبة