والله وبعتولى تاج يا امـــــــه...لولولولى

التاج التاج التاج

واييييييييه
ااااااااااه

تاج ده جايلى يا جماعة من الاختين الحلوين كوكا وايمى

ونقلا عن الفاتحان الجعفرى واليعقوبى

المههم
ادى التاج

وادى الله وادى حكمته

بسم الله وتوكلنا على الله

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟

هو والله مش هيبقى شعور واحد

هو هيبقى مزيج ما بين احساس مابالغيظ من سلبية المصريين

والنسبة التى لا تصدق اللى وصوله ليها من اللامبالاة والسلبية وانعدام الاحاسيس

وايضا شعور كلى بالاحباط مما آلت اليه صورت اولى الامر من فساد وضياع وسلبية فى التوجيه والارشاد

وابتعاد ارض الازهر عن الدين الاسلامى

حقا شعور مؤسف

لوكنت أوروبي أو غير مسلم هتبقي إيه نظرتك للعرب والمسلمين؟

همجيين ويفتقرون لتفكير المنطقى العاقل المنظم

محتاجين اشارة مرور

بس مش بتاعة مصر

ولكنهم ذوى قضية وحق

يطالبون بحقوقهم من ناحية

ومن ناحية اخرى يفتعلون كل السبل لضياعها

شعب عامل دماااااااغ جامدة

ومحتاج اللى يرشه بجردل ماية

وايدكم معايا ندعيله ان يفوق من السطل ده

لوقالولك إنت بقيت رئيس جمهورية هتعمل إيه؟
بكل فخر وشرف وسعادة

هتنحى عن المنصب لمن هو اجدر منى بذلك

اتباعا لمنطق

(من قال لا اعلم ..فقد افتى)

لوسمح لك برؤية الرسول عليه الصلاة والسلام وإنك تقوله كلمة واحدة ؟
بالله عليك ....سامحنى

لو كنا في عصر ازدهار الأندلس كنت تتخيل نفسك إزاي؟

احد اتباع ابن رشد

والله يا جماعة الراجل ده كان دماغ

وبجد كان من اروع القضاه

وكان انسان محترم

على رايى شباب الجامعات

(كان فاهم مش حافظ)

لو خطبت واحدة أو اتخطبتي لواحدوأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

الانسان على بعضه بيكون زى الطرد

وزى ما بيقول الغرب

human beings are like a packages

take it!

or

leave it!!

يعنى لو انا بحب انسان وهو ده عيبه

يبقى ده قدرى ونصيبى

وانا هتمسك بيه لاخر لحظة



لو طلعت القمر هتكتب عليه ايه؟

سبحان الله

(والقمر قدرناه منازل حتى عاد كالعرجون القديم)

عشان كل واحد يطلع بعد كده يعرف ان ربنا صورلنا الكون كله فى القرآن الكريم

وقالنا شكل القمر

قبل ما اى حد يفكر يخترع المركبات الفضائية بمئات السنين

فعلا سبحان الله

لو مررت التاج لحد وماجاوبش هتعمل ايه؟

مش عارفة بصراحة

هافكر فى حاجة اعملها فيه

والى ذلك الحين

يتسحسن كلهم يردوا عليه

تمرر التاج لمين

امرره لــ

كيكو

وعبده محتاس

ومش قادرة

ايوية

اودى

شكرا شباب على التاج

بجد استمتع بيه جدا وانا بجاوبه

تخاريف منتصف الليل

اعزائى المشاهدين

اليكم بعض اشكال الجنان الرسمى التى تجتاحنى

واترك لكم بالطبع مساحة التعليق

فى انتظاركم لو كان لسه ليكم نفس تعلقوا بعدما قريته الكلام الجامد ده

هل تعلم
هل تعلم حين تشعر بالخواء

درب من دروب الغباء
فقدان وحيرة وضياع
تشعر بان روحك ليست معك
اسد جريح فى قفص من ذهب
لا الدواء يشفيه ولا الموت يرحمه
عصفور يرقص رقص الافاعى
مذبوحا يا ولداه على آلآمِه
روح تعافر جاهدة ان تستقيل من ذاك الجسد المنهك
الجسد الشاب الصغير البائس اليائس
ذلك القلب المضطرب الذى لا يعرف كيف يحسم امره
ايتوقف عن الخفقان؟ ام يستمر فى درب الحياة؟

سفن وشراعات دون مرسى
بحور وانهار دون بر
احلام وكلها فى عالم اليقظة
مالها من التحقق درب.

دقات ساعة رتيبة بأمر الحجارة العتيقة
تفكر فى التوقف عن العمل
ولكن يقاطعها عقرب يحصى ثوانيٍ متبقية
إلى أن تحين الآجال

صمت مليء بالمخاوف
نوافذ مغلقة تحمل خلفها
ألاف من الأسرار

عيون مغلقة توقفت عن المحاربة مع بحور الرؤيا
وعيون مترقبة حذرة تخشى الإجفال

أحلام الأنام تحلق في السماوات
رافعة معها العزائم والآمال
ذاك يحلم بالمال
واخر بأبناء
وذلك بعروس تنتشله من بحر العذاب
وأخر برحلة استجمام
وتلك بالفارس المغوار
وآخرون يرجون العفو من الرحمن

وياتى وقتا تتزاحم بداخلى احاسيس معقدة
وتعلو شفاهي وقتها ابتسامتي المُرهقة،
لتنبئني بانتباه احدهم لتسللي خلسة لأراقبهم واعلم إخبارهم.
وها هو قد جاء ليتسامر معي ،
فى وقت اطلب فيه الهدوء مثلما لم اطلبه من قبل

والان ها هنا اجلس كعادتى و قد وصلت لأحد الخطوط التي لا اعلم لما وصلت اليها
لست مكتئبة او حزينة
بل اشعر بالخوااااء
نعم الخواء
تلك هيا نقطة البداية
بل والنهاية ايضا
فالكلام توقف عن المضى تباعا
فيما اردت ان اخطه ها هنا
ولكن بما ان حتى الكلام اصبح يرفض ان يمنحنى الفرصة
فقد قررت ان ارحل واتوقف عن الهذيان والتفكير
اصبحت تحيط بعقلى الغيامات والافكار السوادء
اصبحت اجهل اين انا
بل وماذا افعل حيث انا الان
وماهو المفروض وما هو الواقع
حجرة مظلمة جدرانها باردة سوداء
مبطنة كشى تنعزل عن ما حولها
لا اسمع فيها سوى انفاسى المتلهفة للخروج
ودقات القلب الرتيبة التى مازالت فى حيرة من امرها
وتلك الساعة اللعينة التى يعذبوننى بها
اه لو ادرى السبيل لتحطيمها
بل وان حطمتهاتبقى منها ذلك الصدى المسجل باذنى والذى يطرق باب عقلى

ليذيقنى كؤوس العذاب مرارا وتكرار.

تلك كانت نهاية الشوط الاول....احم احم اقصد الجزء الاول

وطبعا انا عارفة ان الكلام فظيع فى حلاوته فانتم عايزين تكمله

اللى حصل فى تلك الليلة الليلاء

موعدنا مع الجزء التانى فيما بعد

هذا هو الحلم

وانى احبك

لكن ...اخاف..اخاف
اخاف التورط فيكى التعلق فيكى التوحد فيكى

وانى احبك
لكن ...
اخاف
اخاف
اخاف التورط فيك التعلق فيك التوحد فيك
واني احبك
فقد علمتني التجارب آن أتجنب عشق النساء
وموج البحار..
واني احبك
دعيني اصب لكي الشاي
أنت خرافية الحسن هذا الصباح
دعيني أترجم بعض كلام المقاعد وهيا ترحب فيكى
دعيني اعبر عهما يجول ببال الفناجين وهيا تفكر فى شفتيك
ءاعجبك الشاي
وهل تكتفين كما كنت دوما بقطعة سكر؟
أما أنا فأفضل وجهك من غير سكر
دعيني أقول بكل اللغات التي تعرفين ولا تعرفين
احبك انت
دعيني أفتش عن مفردات تكون بحجم
حنيني إليك
دعينى افكر عنك
واشتاق عنك
وابكى واضحك عنك
والغى المسافة بين الخيال وبين اليقين

تلك هيا معشوقتى الثانية....وقريبا سترون الاولى

السكوت اذا سمحتم

السكوت اذا سمحتم
السكوت
فلتسقط الكلمات بغتة
و لتموت
الهدوء
فالحال الرث قد يزداد سوء
و الى الصراخِ لن يجدى اللجوء
اليأس اهدىء
و القنوط
من قال ان الاحلامُ لا ريب آتيةً
لم تفوت ؟
من قال ان فى اللحظة الاخيرة
سيحن البحر , سوف يمنحك الجزيرة ؟
من قال لن يمنحك غرقاً
او يهديك حوت ؟
السكوت اذا سمحتم
السكوت
لا مزيد من الكلام
لا سلام
لا صعود الى الغايات بعد الحينِ
بل سقوط
بل و مرحى بالسقوط
لا مزيد من الحديث او الحوار
لا داعى ان يبقى الصديق الى الجوار
قولوا معى , لا للكلام المستعار
اسف و مهلا
قلنا سكوتاً
فاكتبوها فوق جدران البيوت
السكوت اذا سمحتم
انا لا اريد سوى السكوت
فلتنعتونى بالشذوذِ و بالجنون
انا لا ابالى بضحككم فلتضحكون
و لترفعوا الرؤسَ الى السماءِ و تنظرون
املا فى نور الفجر رغم انى
عشت عمرا انتظر
منه الخيوط
فاعذرونى
للحزن احيا
لن يعيش الحزن دونى
احتاج حزنا , احتاج دمعا فى عيونى
و الحزن
يحتاج السكوت
فالسكوت اذا سمحتم
السكوت

عبد الحميد محمد زكـى
25/ ابريل/ 2007 م

دعــوة للسكــــوت

السكوت اذا سمحتم السكوت

فلتسقط الكلمات بغتة و لتموت

الهدوء

فالحال الرث قد يزداد سوء

و الى الصراخِ لن يجدى اللجوء

اليأس اهدىء و القنوط

من قال ان الاحلامُ لا ريب آتيةً لم تفوت ؟

من قال ان فى اللحظة الاخيرة سيحن البحر ,

سوف يمنحك الجزيرة ؟

من قال لن يمنحك غرقاً او يهديك حوت ؟

السكوت اذا سمحتم السكوت

لا مزيد من الكلام لا سلام

لا صعود الى الغايات بعد الحينِ بل سقوط

بل و مرحى بالسقوط

لا مزيد من الحديث او الحوار

لا داعى ان يبقى الصديق الى الجوار

الجزء ده من قصيدة كتابها واحد من اجمل الكتاب اللى اعرفهم

هوو صديق ليا

وربنا اداله موهبة رائعة

وانا من اشد المعجبين بكتباته

لكن انا اساسا جبت الجزء ده من القصيدة عشان حسيت انه انا محتاجة بعض الهدوء

محتاجة السكوت فعلا

وفى الاخر عايزة بس اقول

السكوت اذا سمحتم السكوت

فى انتظار تعليقاتكم

وليحيا الياس مع القنوط

سؤال....محتاج اجابة

من انا؟

سؤال اتوجهلى وكان المفروض انى ارد
قلت بكل ثقة انا آية
طبعا هتقولولى قديمة
بس هارجع واقولكم
اصل ديه الحاجة الوحيدة اللى انا متاكده منها

المكتوبة فى البطاقة
يعنى الحكومة قالت كده
والحكومة زى ما كلنا عرفين مبتكدبش ابدا
زى ابلة نظيفة كده

المهم
لما فكرت بجد حسيت انى تايهة
مين آية؟
وهيا عايزة ايه؟
الهدف من حياتها ايه؟
وحشة ولا حلوة
طيبة ولا شريرة
مجنونة ولا ست العاقلين
صح ولا غلط
عايشة ولا مش عايشة
وحاجات تانية كتير
كانت محتاجة انى اجيب ورقة وقلم واعد احسبها مع نفسى
واعرف انا مين فى كل دول

معرفش ليه دايما الناس بتلاقى صعوبة فى الرد على السؤال ده
مع انه الطبيعى انه كل واحد مفروض يبقى فاهم هو ايه وهنا بيعمل ايه
وطريقه ايه

وبالمناسبة ديه
احترامى وسلامى لكل انسان يعرف يقول بصراحة شديدة وتامة::من هو

انا اساسا مكنتش ناوية اكتب
بس حسيت انى لازم اكتب

تخيلت انى لو مكتبتش ورخمت عليكم ببوست جديد هيجرالى حاجة
وحتى مش عارفة اكتب ايه دلوقتى
غير انى نفسى اعرف
من انا
خلاص....خلص الكلام
ونورتوا ايامى ..احم احم ....اقصد.. ايامنا

كل سنة وانتم بخير

وحوى يا وحوى اياحا

وكمان وحوى اياحا

رحت يا شعبان

اياحا

جيت يا رمضان

اياحا

رمضان جانا وفرحنا بو بعد غيابوووو

رمضــــــ اهلا ـــــــــــــــــان

كل سنة وانتم بخير

آية

ا ل فـ ج ـ و ة

مممممممممممممممممممممم

بعد تفكير عميييقققق اوى اوى لحد ماطلعت بترول

عشان الاقى فكرة حلوة وطريقة متزهقوش وانتوا بتقروا البوست الجديد

قلت ان احسن طريقة اكون على طبيبعتى

طبعا اسم البلوج يحسسك انها احدى روايات ملف المستقبل للرائع نبيل فاروق

ولا تكون ماوراء الطبيعة لاحمد خالد توفيق

بس للاسف هيا لا كده ولا كده

ديه قصة جديدة نوفىىىىىىىى

بتاعت آية

وبتاعت كل بيت فى مصر فيه شباب

آية الهوبا من امام الشاشة فى اول عرض سنيمائى لها تقدم

ان

ان

ان

اااااااااااااااااااااااااااااااان

تش

الفجوة

عن قصة وسيناريو وحوار جيل 2007 ومن هم تحت ال25

او ال30

عشان منزعلش حد

الاب: يا بنى ايه طريقة الكلام ديه..احترم نفسك انا ابوك

الابن:ايه يا بابا متخليك روش وتصحصح معايا ..بقولك اب بالمعلوم..بدل ما اكمره وانت نايم

الاب : حسبى الله ونعم الوكيل فى ده جيل .. الله يخربيت النت والى بيجلنا من وراه

بذمَتك او بذمِتك متعرضتوش لموقف زى ده

سيبكم من انى فاشلة فى التاليف

وسيبكم من انى مش على دراية كافية باللغة الحديثة

لكن اكيد اتعرضتوا لمواقف مشابها

وهى ديه قصتى

ده موضوعى

وديه المشكلة اللى احنا واقعين فيها

جايز امة لا اله الا الله اتكلموا فى الحوار ده

وانا مش هاحله ولا اقولكم فكروا فى حل

انا بكلمكم من باب الفضفضة

من باب الترويح عن النفس

كامن مرة نزلت ورزعت الباب وراك وانت مش طايق نفسك من الكملتين بتوع كل يوم دول

مش بزمتك كنت حاسس انك عايز تسيب الجمل بما حمل وتشوف حالك

ليه وصلنا للمرحلة ديه ؟؟

ليه فقدنا قدرتنا على التفاهم والتحاور

هل ده لان مع كل جيل بتقل نسب الصبر والتفاهم

هل لاننا بعيد عن الدين؟؟

انا واحدة حاسة انى بعيدة عن اهلى

مش عارفة اتحاور معاهم

مافيش بينى وبينهم اى قنوات اتصال

بقت الحياة عبارة عن رفض وتمرض وعناد واصرار على اخضاعنا لاوامرهم

بجد بقت الحياة مهزلة

انا نفسى احل المشكلة ديه

لكن مش هاعمل نفسى فيلسوفة وانصحكم

لانى انا عايزة اللى ينصحنى

مش شرط اكون غلط

لكن انا الصغيرة

يعنى انا اللى لينة اكتر

ومفروض انا اللى اسايسهم اكتر

واسمع الكلام

بس مش بعرف فى اوقات كتير

مش حساهم بيفكروا زيى

ولا شايفين الحياة من مفهومى

ومش عارفة ايه الحل؟؟؟

قولولي بقى؟

انتم زيى كده؟

ولا عندكم حلول

وكان الله بالسر عليم

استودعكم الله

the end

دعوة للثرثرة

اعزائى المشاهدين والمشاهدات

المستمعين والمستمعات

الصامتين والصامتات

المتحدثون والمتحدثات

المحبين والمحبات

والمسلمين والمسلمات

بسم الله الرحمن الرحيم والصلاة والسلام على اشرف المرسلين

تحية عطرة طيبة مبجلة فظيعة شنيعة ....الخ الخ الخ

اما بعد

انا اتاخرت اوى فى انى اكتب اول بوست ليا

بس كنت خايفة من اللى هاكتبه

وبصراحة ندمت بعد ما عملت البلوج لانى مكنتش عارفة اكتب ايه

انا لا بكتب شعر ولا اى حاجة

انا زى كل البنات المصريات بحب ارغى

مش نميمة

بحب اطلع اللى جوايا عشان عشان ما اموتش

عايزة افضفض معاكم

بس مش عايزة اكئبكم

عرفت مؤخرا ان الهدف من البلوج ده انه الواحد يحكى

ويعرض على الناس افكاره وخواطره

المهم

بما اننا هنبقى اصحاب ان شاء الله

احب اوجه عناية السادة والسيدات انى لست مرتبة فى افكارى

انا بحب ابقى على طبيعتى وانا بكتب

وبالتالى الفكرة اللى بتجيلى باقولها

مش بعيد اندم عليها

بس بما ان الندم مش بيجيب همه

وبما انى مش ناوية ارجع اصلح البوستات فانا هتوكل على الله واقول حاجة

انا مش بتكلم فى السياسة

عشان مبحبهاش ومافيش بينى وبينها عمار

والستات ملهمش فى السياسة

ممكن نتكلم فى البامية او الملوخية اهى على الاقل مضمونة،، لغاية ما يصنفوها اسرار عسكرية تمس الامن العام

بعيدا عن السياسة هنتكلم لما هنقول يا بس

ودلوقتى

فاصل ونعود مع اول مشاكل العصر(( قصدى مشكلتى الاولى))هو انتم وراكم حاجة؟؟؟

بمناسبة اول بوست عايزة اديكم هدية

احدى رباعيات شاعرى المفضل صلاح جاهين

يا حزين يا قمقم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبى

الافتتاحية

مش عارفة المفروض افتتح واكتب ايه

بس كل اللى هاقدر اقوله انه فى المدونة ديه

هنعيش مع بعض عالم بتاعنا احنا بس

هنتكلم مع بعض ونحكى عن همومنا ومشاكلنا واحلامنا وطموحنا وافكارنا

وكل حاجة

تبقى بجد المدونة ديه هيا ايامنا

مستنياكم....