اعزائى المشاهدين والمشاهدات
المستمعين والمستمعات
الصامتين والصامتات
المتحدثون والمتحدثات
المحبين والمحبات
والمسلمين والمسلمات
بسم الله الرحمن الرحيم والصلاة والسلام على اشرف المرسلين
تحية عطرة طيبة مبجلة فظيعة شنيعة ....الخ الخ الخ
اما بعد
انا اتاخرت اوى فى انى اكتب اول بوست ليا
بس كنت خايفة من اللى هاكتبه
وبصراحة ندمت بعد ما عملت البلوج لانى مكنتش عارفة اكتب ايه
انا لا بكتب شعر ولا اى حاجة
انا زى كل البنات المصريات بحب ارغى
مش نميمة
بحب اطلع اللى جوايا عشان عشان ما اموتش
عايزة افضفض معاكم
بس مش عايزة اكئبكم
عرفت مؤخرا ان الهدف من البلوج ده انه الواحد يحكى
ويعرض على الناس افكاره وخواطره
المهم
بما اننا هنبقى اصحاب ان شاء الله
احب اوجه عناية السادة والسيدات انى لست مرتبة فى افكارى
انا بحب ابقى على طبيعتى وانا بكتب
وبالتالى الفكرة اللى بتجيلى باقولها
مش بعيد اندم عليها
بس بما ان الندم مش بيجيب همه
وبما انى مش ناوية ارجع اصلح البوستات فانا هتوكل على الله واقول حاجة
انا مش بتكلم فى السياسة
عشان مبحبهاش ومافيش بينى وبينها عمار
والستات ملهمش فى السياسة
ممكن نتكلم فى البامية او الملوخية اهى على الاقل مضمونة،، لغاية ما يصنفوها اسرار عسكرية تمس الامن العام
بعيدا عن السياسة هنتكلم لما هنقول يا بس
ودلوقتى
فاصل ونعود مع اول مشاكل العصر(( قصدى مشكلتى الاولى))هو انتم وراكم حاجة؟؟؟
بمناسبة اول بوست عايزة اديكم هدية
احدى رباعيات شاعرى المفضل صلاح جاهين
يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبى
9 comments:
يا شلام عليك يا جاهين
عجبي فعلا
اهلا اهلا باهل الفن
مرورك ده وسام يا دكتور
وفعلا جاهين من اروع الشعراء
ان مكنش هو اروعهم
انا الرباعيات بتاعته ديه بجد كانت احلى حاجة قريتها
وان شاء الله هتلاقى دايما فى المدونة رباعيات ليه واشعار
اهلا بك
دمك خفيف بجد وواضح انى هبقى مدمنة لمدونتك
احييكى على اخيار صلاح جاهين
وبمناسبة انك خايفة تندمى على ما تكتبى احب اقولك حاجة
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي !!!
اي حد بيحب صلاح جاهين احبه علي طول
يبقي بيفهم فكرتيني بنفسي لما جيت اعمل البلوج في ميت حاجخ مواضيع علي زجل ومش عارفه ابدا منين
بس انشاء الله هتبقي مدونه جامده وهفضل راشقالك هنا لحد ما تطرديني
انتي طلعتي محترفة اهو و اخر جمال
قال مبعرفش اكتب قال
ده تواضع منك بقى
مبروك الافتتاح و قد تم قبول الهدية الجميلة
ولو اني كنت مستني على الاقل ازازة حاجة ساقعة
سلام مؤقت
هستناكي بقى عشان اشربك كابتشينو محصلش
ايوية الجميلة:
مرورك اسعدنى
وتسلمى يسا جميلة على كلماتك
والرباعية الرائعة
هستنا منك دايما التنحليل النفسى لما اكتبه
وده مش تهريج ده طلب بجد
coca
ياريت تفضلى هنا ابد الدهر
انا افديك الساعة لما انسانة جميلة زيك تنورنى
اهلا بيكى
SH AH
والله احرجتنى بكلامك
تسلم يارب
وهستناك دايما هنا
وليك عندى واحد كابتشينو اصلى من بلاده بالكرتونة
اهلا بيك
أولاً أخت آية ألف ألف مبروك والله على افتتاح المدونة الجديدة..وعموماً ولا يهمك من الموضوع..الأمر عادي جداً..شخصياً أنا مدونتي اسمها من مفكرة حالم لكن مش كلها أدب وشعر..بكتب عن الأنمي برضه^^..
والأنمي عموماً عالم جميل جداً على فكرة..
وبمناسبة الرغي..الغري مش دايماً صداع برضه..أحياناً بيبقى مرحي لانه فضفضة على كل حال^^..
وألف مبروك كمان مرة على المدونة الجديدة..على فكة صورة البروفيل بتاعتك جميلة أوي..كورابيكا ده صح؟ ^^
شكراً..
محمد المصري
Post a Comment