تاج زهايمر

بسم الله الرحمن الرحيم

اخوانى البلوجرززززز

كل سنة وانتم طيبين يارب

شهر 9 ده شهر جمييييييييييل جدا

اولا لانه فيه شهر رمضان حبيبى

انا بموت فى الشهر ده

بحس انه اجمل شهر فى السنة

وساعات بتمنى انه يبقى طول السنة رمضان

وارجع اقول لا

كده هو مميز

شهر واحد

بجد الشهر ده بتحس ان موجة عارفمة من الهدوء والحب والسكينة والطمئنينة بقوا فى قلبك

بتحس ان كل حاجة بتقف فى الدنيا

المشاكل والزعل والضيق والهم

شهر جميل

تحسه ان االشوارع مزينة والناس بتضحك

وكله جميل

وغير كده بقى ماى عيد ميلاد فى شهر 9

وده طبعا يوم تاريخى

كفاية انى جيت للدنيا ديه

----------------------

المهم بقى يا شباب

بما انى كان عندى زهايمر وكنت عاملة بيات صيفى

قعدت اعصر نفسى وافتكر مين فى المدونين بعتلى تاج وقالى عليه وانا نسيت
الهم فضلت ادور

لقت تاج عن مدحت محمد من شهر مايو

لكن مش هو ده اللى بدور عليه

معنا كده انى لازم ابدا علاج

المهم انا هجاوب التاج

بسم الله توكلنا على الله

---------------------------------

السؤال الاول

اذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
1- انى اكون صيدلانية

والحمدلله انى مبقتش كده

2- انى ابقى رفيعة خالص كده زى العروسة باربى

هههههههبس ليس كل ما يبغيه المرء يدركه

3- انى يبقى عندى اوضه لونها لبنى وتكون كلها دباديب

جبت الدباديب ناقص اللون اللبنى

4- انى العب تنس وابقى حاجة كويسة كده فيه

بس الحمدلله لعبت بلى مسافات طويلة

5 -انى ارضى امى وابويا وربنا قبل كل شيئ

ولازال العمل على تحقيقه مستمرا ونأسف للازعاج

السؤال التانى
أذكر خمس أحلام على الاقل ..تخص مستقبلك

1- انى اتجوز انسان متفهم وهادى ومتدين ويراعى ربنا فيا ويحبنى

2- انى يبقى عندى اربع اطفال بنتين وولدين

سيف ويوسف وايثار وجانا

3- ان بيتى يكون بيت مسلم هادئ كله حب وسعادة وضحكات تملاء جدرانه

4- انى مشتغلش ومتكونش حياتى المادية فى حاجة انى انزل اشتغل

5- انى لحد ما اموت اتجنب اى خناق بصوت عالى مع جوزى او اولادى

وان بيتى يكون مالوش حس ماعدا الضحكات وصوت القرآن طبعا اساسى

السؤال التالت
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن

ياسمين صحبتى اللى ساعدتنى كتير فى حياتى

واحمد صديق عزيز وحد بحترمه كان نفسى اقابله قبل ما يبقى غير قابل للحب

السؤال الرابع

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا

جدتى الله يرحمها

كان نفسى تكون موجودة وتنصحنى وتفضل تقولى يا آية متزعليش ماما

كان نفسى تكون موجودة تسأل عليا قبل اى حد بعد كل امتحان او مرض

مع انها كانت كبيرة فى السن الا انها عمرها ما نسيت اى امتحان عليا

كانت نفسى تبقى موجودة وتقول مع اولادى قصيدة رثاء الخنساء

وجدو

لانه كان راجل بمعنى الكلمة

نفسى كان ياخدنا يفسحنا زى ما كان بيعمل دايما

وحشونى اوى

امرر التاج للى يعدى ويقراه

تاج + تاج = تاج *2

بصوا كان فيه كذا تاج كده عند ناس كتير مفروض اجاوب عليهم
انا اساسا اتلخبط وجالى تخلف عقبال ما عرفت افهم مين بعتلى ايه
بص الحصيلة كانت تاجين
مين اللى بعتهملى بالضبط مش هاقدر احدد
بس هما من
كيكووووو ،،،تشى ى ى ى ى ى ،،،، مش قادرة ،،،واخيرا وليس اخرا من خالو احمد

فيه منهم اللى بقاله زمن
وفيه منهم اللى اتبعتلى كاانتقام بعد ما بعتلهم تاجات
المهم يعنى انا هاجاوب على التاجين وربنا يسترها معانا
-------------------------------------------------

التاج الاول
ان ان ان اااااااااان
تش

هل توافق على حذف الديانة من البطاقة الشخصية ؟
لا مش موافقة
صحيح هو فى الاخر الدين لله وياما مسلمين مكتوب انهم مسلمين وميعرفوش يعنى اسلام
ومتخيلين ان اركان الاسلام اربعة
ومنهم اللى بيقول ان الحجاب لا فرض ولا سنة
يعنى
الله اعلم بما فى قلوب الناس
ولكنه فقط عنادنا فى اللى عايزين يشيلوها
-------------------------------------------------
ما رأيك في المثليين ، هل توافق على الاعتراف بالمثليين ، وهل هى حرية شخصية ، وهل لديك أصدقاء من المثليين؟
الموضوع ده بالذات فكرت فيه كتير
اولا انا بداية علمى بالمثليين كانت من قريب
انا كنت فاكرة ان الموضوع ده خيال علمى
او انه كان قصة قوم لوط وخلاص حاجة قديمة يعنى
مكنتش متخيلة ان فيه مجتمع مثلى قائم فى مصر
هو بما ان الحق احق بان يقال
وانا اسفة لو كنت هجرح حد بالكلام ده
لكن المثالية حرام
واللى يقول غير كده مع نفسه
ده حكم ربنا
وده شرع ربنا
ومهما احنا كان نفسنا نغير الواقع
لكن هو ده الواقع
المثالين مخالفين شرع ربنا
وارجعوا لقصة قوم لوط فى الكلام ده
بالنسبة بقى للاصدقاء المثليين
اتعاملت مع واحد او اتنين منهم
هما شخصيات طبيعية ما عدا وجود اضطراب فى الجزء ده اللى بيتعلق بالشذوذ
وفى الاخر معنديش غير ان ربنا يهديهم ويعفو عنهم وعنا
------------------------------------------------------
هل تعتقد بوجود اضطهاد في مصر للمسيحيين ؟
انا اعتقد بوجود اضطهاد للمسلمين فى كل مكان
--------------------------------------------------------
من هو الشخص الذي تختاره لرئاسة الجمهورية ؟
ااااه بس لو كان موجود
كانت كل حاجة بقت كويسة
لو اخترت
هاختار عمر بن الخطاب
ولا احد سواه
كم احب هذا الرجل
وكم اتمنى ان التقى به فى الجنة بعد ان التقى بحبيبى محمدا
ان شا ءالله
-----------------------------------------------------------
إذا قمت بتأسيس حزب ..... من هم الأشخاص الذين ستضمهم في الحزب ليشاركوك في حكم مصر ؟
كل الصحابة رضى الله عنهم وارضاهم
مافيش حد فى الدنيا ديه ينفع
بس هما فيه خمس اشخاص نفسى انهم يبقوا ذات سلطة فى مصر وكلى امل انهم يغيروا حاجة
هما:
استاذ عمرو خالد،معز مسعود،مصطفى حسنى،خالد الجندى،وعمرو موسى
دول اكتر خمس بنى ادمين بثق فى ارائهم
فى الزمن الغريب ده
----------------------------------------------------------
في حالة فوزك في الانتخابات .... هل توافق على مشاركة كل من الأخوان المسلمين والاقباط في الحكم ؟
اوافق
بس من باب الديموقراطية والسعى لرقى بمصلحة مصر
مش عشان انا مغصوب عليا ولا حاجة
ايام العصور الاسلامية كان المسيحين يعاملوا افضل معاملة ومكنش حد يطول يتعرض ليهم
لكن فى قصة الحكم ديه كانت بتاعة المسلمين
يعنى مش لعبتهم

لكن فى العصر ده مافيش مشاكل لو كلنا اتعاونا مع بعض عشان نعمل حاجة
كل ده لو بس رجعنا بقينا بنى ادمين
---------------------------------------------------------
في رأيك الشخصي . ما هى أفضل مدونة قمت بزيارتها ؟
مش عارفة احدد
لكن كل اللى الناس اللى موجودين فى المدونة عندى فى اللينكات دول بحب اوى اكون عندهم ومعاهم
وفين ناس تانين غيرهم
كلهم ناس زى الفل ومحترمين
مافيش حاجة اسمها افضل
كل واحده فيهم جميلة باسلوب صاحبها
يعنى مافيش بينهم عناصر مقارنة
-----------------------------------------------------
هل توافقين على الزواج من رجل مطلق ؟
بصرف النظر عن اللقب اللى بيسبق اسمه
كل ما يهمنى انه يكون انسان محترم
وفيه اللى انا هاعرف اتعامل معاه
-------------------------------------------------
أى الأسماء تحب أن تسميها في حال أن انجبت ولدين وبنتين ؟
خليهم تلاتة وتلاتة
الولاد:
سيف و يوسف و زياد
البنات:
جانا ، منار ،ايثار
----------------------------------------------------
ما هو أفضل انجاز لحكومة مبارك ، وما هو أسوأ عمل قامت به ... في رأيك ؟
افضل انجاز؟
الطريق الدائرى والمحور وكوبرى المنيب
والمترو

اسواء انجاز
انهم حلفوا اليمين
وهما بكده نكثوا باليمين
وحنثوا به
وعقابهم عند ربنا عشان ديه لوحدها هيبقى وحش اوى

ربنا يسترها معاهم
--------------------------------------------------------
هل تعتقد أن توريث الحكم في مصر سيتم فعلا أم لا ؟
هو اللى سأل السؤال ده مصرى يا جماعة؟؟؟
باينه مش عايش فى مصر
كل سنة وانت طيب
-------------------------------------------------------
-------------------------------------------------------

التاج التانى

انت ليه بقيت مدون ( يعنى ايه خلى الفكرة بتاعت التدوين تجيلك اصلا ) ؟؟
مش عارفة
انا شفت واحدة صحبتى عندها بلوج وانا قبليها كنت على طول
فى المنتديات وكده
فاعجبتنى الفكرة انه يبقى عندى مكان ادون فيه براحتى وابقى انا رئيسة نفسى
والعب فيها زى ما احب وكده
بس وعملت مدونة
--------------------------------------------------
ايه هى اول مدونة عرفتها ؟؟
غالبا مدونة طهقان
لان كانت عجبتنى قصصه هو طهقانة
وكنت دعتهم للمنتدى بتاعنا
وكنت من زوار مدونتهم دوما
فاغالبا مدونة بشمهندس طهقان كانت اول مدونة اعرفها
-------------------------------------------------------
ايه اكتر سلبية انت شايفها فى المدونات؟؟
ان الناس بتاخد المواضيع من المدونات كوبى وباست من غير راى صاحب المدونة
وتنشر مواضيعهم باسمائهم
من غير ما يذكروا اى حاجة عن المدون الاصلى
------------------------------------------------------
ايه اكتر حاجة لمستها بتفيد المجتمع من التدوين ؟؟
التفريغ عن الافكار والكبت اللى احنا حاسين بيه
لانه لو مش عرفنا نقول اللى جانا هيجرالنا حاجة بقى
--------------------------------------------------
هل غير التدوين جواك حاجة معينة ؟؟
اه....حسيت انى مش بنى ادمة هايفة او كل اللى بقوله كلام فاضى
حسيت انى ممكن اكون كويسة زى الناس اللى بتكلم ديه
------------------------------------------------

هل لقيت التدوين كتفريج هم ومنبر عالى تقدر صوتك يتسمع من عليه ؟؟

انا يا عم لا عايزة صوتى يتسمع ولا حاجة

انا كويسة كده

لكن اكيد المدونة بتاعتى مكان اقدر اقول فيه اللى انا عايزاه من غير ما حد يوقلى عيب ولا ميصحش ولا مش عارفة ايه

-----------------------------------------------------

هل حسيت ان التدوين عالم كبير انت عايش جواه واصبحت فرد منه ؟؟

اه

حسيت انه عالم جميل جدا مكنتش اعرفه

بس انا مش زى الناس الكبيرة اللى بتكتب فيه

انا بس على اعتابه

ومقدرش اقول انى زى الناس المدونين الجامدين اللى فيه

--------------------------------------------------------

هل اكتسبت صداقات من التدوين ؟؟

الحمدلله

بجد فيه ناس منهم زى الفل

وعرفت ناس بجد بحترمهم اوى

وبحمدربنا انى عرفتهم

سواء اتكلمت معاهم او متكلمتش معاهم

بس بجد بحب اقرى كلامهم

وببقى فى قمة سعادتى لما اشوفهم بيدخلوا عندى وبيعلقوا

------------------------------------------------------------

هل أثر التدوين فى نظرتك للحياة من حواليك ؟؟

مش اوى

عادى يعنى

حسيت بس انه لسه فيه ناس كويسين فى المجتمع

ومش كلهم اتضربوا

وان الرجالة ماتوا اه فى تلاتة وسبعين

بس لسه موجود منهم شوية معقولين

-----------------------------------------------------------

هل قفلت ( أو فكرت تقفل ) مدونتك فى يوم ؟؟ وليه ؟؟

لا مفكرتش

وربنا ما يجعلنى افكر فى الموضوع ده

-------------------------------------------------------------

هل فكرت تسيب التدوين تماما وتخرج من العالم دا ؟؟ وليه ؟؟

مرة

وكتبت بوست بالكلام ده

بس مكنش نهائى كنت هاخد فترة كده ابعد عن التدوين

بس حسيت انه لا مش هينفع

انا معنديش مجال انى اصرخ غير هنا

---------------------------------------------------------------

---------------------------------------------------------------

على غير العادة انا مش بمرر التاجين دول لحد

كفاية على الناس اللى اخدته من التيجان

واخيرا

نشكرا لكم حسن استماعكم ونتمنى لكم يوما تدوينيا موفقا

مع تحيات اسرة الاذاعة التدوينية

رجعت من الامتحانات بخفى حنين.....وتاااج

طبعا وانا كلى حسن نية رحت ازور ايمى وكوكا بعد غياب

وحصل ما حصل

ان ان ان ااااااااااااان

تش

لقيت تاج بانتظارى

تاج جديد من ايمى وكوكا

وتفوح منه رائحة سياسية اصابتنى باختناق مؤقت

على العموم

ربنا يستر

بسم الله توكلت على الله

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
اللاب توب

كنت تفضل الدخول مستقل او تتبع حزب معين ؟؟؟؟

اسمها مستغل مش مستقل

فمجلس الشعب ليس فيه اعضاء مستقلون

اعضاء اليوم

مستغلون

ومع ذلك اتمنى ان اكون مستقلة

اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟

عند امه يا ادهم

حزب وطنى ايه

ده وطنهم هما مش وطنى انا

اول حاجه هتعملها لنفسك ولاسرتك ؟؟؟؟؟

من وجهة نظرى

ساتنازل عن الحصانة

ايه المشروع اللى ناوى تعمله لاهل دايرتك ؟؟؟؟

بالنسبة لواحدة زيى شافت الذل والهوان فى شارع القصر العينى

يبقى اكيد باذن الله هاطالب بعدم مصاحبة موكب مرافق لاعضاء المجلس والمجالس المجاورة الصديقة

وساذهب الى ومن المجلس فى سيارتى

او اى سيارة الظباط ميعرفوهاش ويوقفوالى الشارع عشان اعدى

ده لو كان عندى سيارة يعنى

وربنا يستر من دعاوى الناس على مجلس الشعب واعضاءه

دون ذكر اسم الدائرهقعدت فى المجلس جنب نائب مميز .

من هو النائب ؟؟

احمد عز

عشان احاول اخد منه عينة دم مفاجاة

زى الست بتاعة فايس اوف لما اخدت عينة من جون ترافولتا عشان تعرف ان كان هو جوزها ولا لا

واعرف هو نوع دمه ايه

ده ان وجد

قدمت سؤال للحكومه ايه هو السؤال ؟؟؟؟؟

تعرفوا ربنا؟؟؟

طلب احاطه موضوعه ايه ؟؟؟

انا معرفش اسمه ايه

بس الراجل اللى بيجى فى كل قرار ده يقولهم موافقون؟

ومحدش يرفع ايده ولا يتكلم

يقوم هوا قايل موافقون ويختم

عايزة اساله يا ترى راح لدكتور عيون قريب؟

وبتقدمه لمين ؟؟؟؟

هو الراجل اللى فوق ده

استجواب لاتنين من الوزراء موضوعه ايه ؟؟؟؟

جنسك ايه ؟

و

do u speak arabic?

وبتستجوب مين

اول واحد للست اللى قالتها صراحة ريحوا نفسكم مش هستقيل

بعد ما خربتها وقعدت على تلها

والتانى للاخ المحب المحبوب الحبوب المحبب

حبيب العادلى

اللى هو لا حبيب

ولا عادل

عايزة اعرف يا ترى هو بيفهم انهى لغة

دا حتى واضح انه مالوش فى لغة الاشارة

انت مع الخصخصه ؟؟؟؟؟؟

مش اى خصخصة

لو خصخصة لناس مصرية ناوية تعمل حاجة بجد

واقتصادنا مش هيطلع بره وهيفضل مننا ولينا

يبقى اللهم ما صلى على النبى

لكن لو شوية ناس جواسيس مبعوتين من ناس من اللى بالى بالكم

وجايين يخصخصوا الليلة عشان يستولوا على الاقتصاد بتاعنا المرحوم المغفور له

يبقى لا

وهاطالب بالقاء القبض عليهم

هل انت مع قطع العلاقه مع اسرائيل ؟؟؟؟؟

اكيد

ومش بس قطعها لو ينفع نسفها يبقى خير وبركة

وما يترتب عليه من معامله العدو هل تؤيد الحرب على العراق ؟؟؟؟؟؟؟؟

لا طبعا

لانى لو ايدتها يبقى كانى انا كمان بعلن الحرب على العراق

وديه حاجة مقدرش اعملها

هل تؤيد مرور الامريكان فى القناه ؟؟؟؟؟؟

لا

مش مؤيداه

وتغور الفلوس اللى بتجلنا من وشوشهم

ولا سفن تجارية ولا حربية ولا اى حاجة

ومش بعيد اى مركب تحاول تقرب هافجرها

هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟

هاه؟؟؟

i don't speak english

بتمرر التاج ده لمين ؟؟؟؟؟

لاول خمسة يدخلوا هنا

سواء علقوا او لا او حتى جم غلط

وديه امانة بحملهلم قدام ربنا

مما يتطلب طبعا منهم انهم يقولوا انهم دخلوا عشان منلبسش ناس فى تاج بالغلط

وطبعا ممكن يكونوا اخدوا التاج ده قبل كده

برضه يكتبوا ويراعى من ياتى بعدهم الحكاية ديه

وغير كده اى حد عايز ياخدوا يتفضل بس يقولى هو مين عشان اشوف اجاباته

مرسييييييييييه كتير

وابقول اسالوا عنى بقى لو غبت

وبالنسبة لمن سبقونى وجاوبوا على التاج وفقدوا فى ظروف غامضة

فانتم السابقون ونحن اللاحقون

وسبحان من له الدوام

سلام