بسم الله الرحمن الرحيم
يا سلام
يا سلام لما تبدائى اى حاجة وانتى بتقولى بسم الله يا رحمن
الله على ديه كلمة مريحة للقلب
قد ايه بتطمنى انك بتستعينى بالرحمن
وبتسمى بصفة الرحمن
قد ايه انا بحب سورة الرحمن
من اجمل سور القرآن
عروس القرآن
بجد سورة تحسى بعديها ان بسمة خفية اترسمت على وشك
متعرفيش ازاى
بس ايا كان اللى جواكى
سورة الرحمن ديه كفيلة انها تشيله منك
عامة صفة الرحمة ديه صفة جميلة
يعنى لما تقبلى حد رحيم كده
بتحسى تجاهه بود
لانه بتلاقيه دايما طيب كده وعلى وشه برضه ابتسامة حنينة
حتى احنا يا ستات اول صفة قلبنا بيميل ليها فى الرجالة هى الحنان والحنية
وهما وجه اخر لعملة الرحمة
والطيبة
كلها صفات تخليكى عندك هدوء داخلى لما تتعملى مع الانسان ده
ما بالك لما يبقى ربك هو الرحمن الرحيم
ياااااااه
عارفين
انا زمان لما كانوا بيقولولى سمى قبل ما تعملى اى حاجة مكنتش فاهمة ليه
وبما ان العند والدماغ الناشفة اللى عايزة الكسر صفة اصيلة فيا وواخدة حقها كمان
فامكنتش بسمى
اوعوا حد يشهق بقى ولا يتخض ويقول يااااااه اخص يا آية مكنتش بتسمى
انا فيا عيب
انى مقدرش ابدا اعمل حاجة غير لما ابقى فاهمة ليه
ما بحبش حد يستحمرنى
ولما كنت اسالهم يقولولى عشان المفروض كده
مكننتش فاهمة يعنى ايه المفروض كده
مش معقول ان ده قانون
ومش معقول انها مجرد عادة
لكن لما كبرت وفهمت الدين بقلبى مش بس بعقلى فكرت
انا ليه بقول بسم الله الرحمن الرحيم
بصوا ..بصوا
عشان متهوش منى هاديكم مثل
لو انا مثلا بشيل بيبى صغير
وده اكتر موقف بحس انى لازم اقول فيه كتير بسم الله الرحمن الرحيم
وانا بشيل البيبى ده ببقى مرعوبة لشيله غلط ولا يقع منى بعد الشر او اى حاجة تحصل
وعشان انا اساسا مؤمنة انه اى حاجة بتحصل هى بايد ربنا
فا بقول بسم الله الرحمن الرحيم
يعنى بسم ربنا الرحيم على الطفل
اللى ان شاء هو مش هيخلى حاجة وحشة تحصله
يعنى بس ربنا الحنين اللى بيخاف على الطفل الصغير ده
انا مش عارفة اوصلكوا اوى احساسى
بس لما بقولها بحس انى بقول لربنا
بحق رحمتك استرها ومتخليش حاجة وحشة تحصل
مش عارفة بقى
بس فعلا لما تفكروا فيها ليه مكنتش بسم الله القوى المتين
ليه مكنتش بسم الله السلام القدوس مثلا؟
فكروا فيها تلاقوا انكم لما تبدا اى حاجة بتبقوا خايفين
فا بتحتاجوا السلام والهدوء الداخلى اللى اتكلمنا عليه
فامحتاجين تسموا بالرحمن الرحيم اللى باذنه مافيش حاجة وحشة هتحصل
======================
اساسا اساسا انا مكنتش عارفة اكتب ايه
ومكنتش لاقية كلام اكتبه
والله العظيم الشاهد عليا البوست ده كله جه فى دماغى وانا بكتب بسم الله الرحمن الرحيم
مش بقولكوا ربنا ده كريم اوى
========================
ملحوظة صغنونة
كل الكلام ده مش مبنى على اى اساس علمى
ده كله احساسى
قصدى انى مدرستش اوى هى ليه كانت بسم الله الرحمن الرحيم بالذات
ده مجرد شعور فى قلبى
عشان بس مخدش وزر اى حد يفهمنى غلط
==========================
يالا
استودعكم الله
وسورى لو رغيت فى ودانكم كتير
بس كانت فكرة فى دماغى
وقلت اشارككم فيها معايا
ربنا يجازيكم خير على وقتكم ده
ويكرمكم يا رب
استودعكم الله
-------------------------------
آه صحيح
بمناسبة سورة الرحمن انا بهديكم سورة الرحمن بصوت الشيخ محمد جبريل
وهو اساسا صوته ماشاء الله يخليكى تقشعرى بدنا كده
ما بالكم بقى وهى يقرآ سورة الرحمن
يارب يكرمكم
14 comments:
بسم الله الرحمن الرحيم
فعلا يااايه الجمله دي كبيره اوى وعناها كبير اوى
انتى بتبدئي باسم ربنا الرحمن الرحيم
حاجه كبيره احنا مش متخيلينها
زمان برضه كانوا بيقولولي سمي عشان الشيطان ميعملش الحاجه اللى انت بتعملها
يعني مثلا لما تسمي قبل الاكل الشيطان مياكلش معاك او قبل الشرب برضه
فعلا الجمله دي من اربع كلمات لكن معناها كبييير اوى اوى اوى
واكيد لما تقولها في الاول
هتلاقي حاجات كتير اتسهلت قدامك مش شرط في اكل مش شرط في شرب في كل حاجه حتى ولو الحاجه دي صغيره اللى انت هتعملها
شكرا ياايه على الموضوع الجميل ده
جميل قوي إحساسك ده يا ايه ورائع
وأجمل إن الواحد مننا يفهم الدين بعقله ودي نعمة ربنا بينعم بيها على من يحب ومش بيديها لكل الناس
وسورة الرحمن دي من السور المحببة لقلبي فعلا وباحب أسمعها بصوت مشاري راشد
قد ايه الراجل ده أبدع فيها فعلا وخصوصا عند أيه ( حور مقصورات في الخيام )
باحس انه بيقول افهموا بقى ربنا هايديكوا ايه في الاخرة لو سمعتوا الكلام
خاطرة طيبة وعاطرة فعلا
دمت بسعادة وسرور
انا سمعت زمان واحد قال ان ايام الكتاتيب كانوا بيبداوا يحفظوا الاطفال بسورة الرحمن لانها سهلة عشن فى اياتها سجع عامل تناغم روحانى جميلة غير معانيا طبعا غير ان دى السورة الى ربنا حيقراها علينا يوم الحساب
تعرفي الأجمل من التفسير والشرح اللي قدمتيه ايه؟؟؟؟؟؟؟
التفكير في معاني الحاجات البسيطة اللي ممكن نكون بنطقها كل لحظة من غير تفكير او اهتمام؟؟
بجد أحيكي على اسلوبك ومنطقك السليم في التفكير
تقبلي مروري
دى اسمها الهامات يااية
ربنا يفتح عليكى يارب
ويجعل سورة الرحمن عروس القران
شفيع ليكى يوم القيامة ومنجية ليكى
وحبك لكلام ربنا دليل ان ربنا بيحبك
اخيرا
يا سلاااام
أخيرا الواحد رجع لعالم التدوين بسلام
الحمد لله
بعد كده مش حأغيب عنه تاني
على فكرة البوست ده جميل جدا قوي خالص
خالص تحياتي
أحمد توفيق
تخيلي انتي بقى كل واحد فسر بسم الله الرحمن الرحيم بما تريح نفسه هتعرفي قد ايه الدين ده عظيم وفعلا بيريح القلوب والله بالرغم من ان تفسيرك مش ديني ده مجرد احساس بس مش غلط واقنعك ان انتي لازم تقولي باسم الله الرحمن الرحيم
تحياتي
السلام عليكم
*****
اهنئك على البوست الرائع الجميل بجد بوست جميل جدا جدا جدا وكلو خير تقبل منكى الله ان شاء الله الرحمن
وموضوعو جميل جدا بسم الله بدايت الكلام وهيا عباره عن تذكير ان كل شيئ فى بدايت الله وينتهى بالله الحمد لله او حديث ترك الحديث وهوا سبحانك اللهما وبحمدك استغفرك واتوب اليك وهذا حديث ترك الحديث وشكرا لى اتاحه التعليق واتمنا
زياره مدونتى من الجميع
بسم الله الرحمن الرحيم
الله الله ما اجملة من احساس بجد انتى احساسك جميل جدااا
جزاكى الله كل خير
وبجد انا برضو بحب سورة الرحمن جدااااا
تحياتى ليكى
عزيزتى
طبعا بسم الله الرحمن الرحيم بتدى راحة للانسان لان ربنا هو اللى بايدية كل شئ
بس المهم بقولها وانا بفكر فى معناها واهميتها
بس طبعا ممكن حاجه ما نبتديش بيها باسم الله لان الحمد الله الاسلام فيه لكل شئ كلماته من الدعاء او التسبيح
واقصد مثلا فى دعاء للدخول اقوله حتى لو هقول بسم الله الرحمن الرحيم
ودعاء الركون ودعاء دخول الحمام و...كتير
تحياتى على موضوعك الجميل المريح
سلام
اخوانى المدونين الاعزاء اوى عليا
بجد ربنا يجازيكم كلكم الخير لردودكم ديه
اسفة انى اتاخرت
بس بجد سعيدة للغاية بالردود
نورتونى كلكم
alllah yafta7 3leky
Te3rafy kaman law 2olty besm allah we el salt we el salam 3ala rasol allah
Tla2y rabena barek we sahel
Salam
بسم الله الرحمن الرحيم نبدأ
وعلى الله نتوكل
والله المستعان فى الأمور كلها
طهقانة
الله يكرمك ويجازيكى خبر على الذكر الجميل ده
تسلمى
========================
mohamed ghalia
الله يكرمك
وربنا يعينك ويعينا
Post a Comment